غنّى لتبقى المرأة في المنزل... فأنزل النساء إلى الشارع

صورة للفنان اللبناني محمد اسكندر منشورة على مجموعة فايسبوك المؤيدة لأغنيته :
"نحن ما عنّا بنات تتوظّف بشهادتها... شغلك قلبي وعاطفتي وحناني... مش رح تفضي لأيَّ شي ثاني. بيكفّي إنّك رئيسة جمهوريّة قلبي"...

بهذه العبارات افتتح الفنان اللبناني محمد اسكندر أغنيته الأخيرة "جمهورية قلبي"

أغنية ذكورية دعت إلى إبقاء المرأة في المنزل فأنزلت إلى الشارع الجمعيات النسائية في المنطقة.
في الثلاثين من أبريل، قامت جمعيات نسائية بالاحتجاج وسط شارع الحمراء التجاري في بيروت على من "يتعامل مع المرأة بصورة نمطية" كالتي صوّرت في أغنية "جمهورية قلبي". وفي اليوم التالي، دعا مرصد نساء سوريا الإذاعات السورية إلى مقاطعة الأغنية التي "تروّج للانحطاط والعنف تحت اسم الفن"!
ردًّا على هذه المطالب النسائية، أنشئت مجموعة على موقع فايسبوك للدفاع عن الأغنية التي صدرت قبل قرابة الشهر وهي مذاك الحين في طليعة مسابقات الأغاني في عدد من الإذاعات البيروتية.
الأغنية التي أثارت موجة الاستنكار

"هذه الأغنية تروّج لطريقة في الحبّ تحتجز المرأة في البيت
لين الهاشم عضو في جمعية "نسوية" الناشطة في مجال حقوق المرأة، نظّمت التظاهرة المناهضة لأشكال الفنّ الهابط في 30 أبريل.

استمعت إلى أغنية محمد اسكندر للمرة الأولى وأنا أقود سيّارتي. ولا أخفي عنكم أن كلماتها أغاظتني بحيث اضطررت إلى ركن السيارة جانبا. فالاتجار بجسد المرأة وبحقوقها ليس فنًا بل هو إهانة لكل النساء.

في السنوات الأخيرة، طالعتنا أنواع كثيرة من الفنّ الهابط لكن هذه الأغنية قصمت ظهر البعير. لذا قررت عدم السكوت مرّة جديدة عن هذه الإهانة. وأنشأت مجموعة على الفايسبوك دعت إلى التظاهر احتجاجًا على أشكال الفنّ والإعلام المسيئة للمرأة.


تلقى هذه الأغنية أصداء لدى شريحة من الناس تؤمن بعدم جواز عمل المرأة وتعزّز ثقافة خطيرة تروّج لطريقة في الحبّ تحتجز المرأة في البيت.

والأخطر من ذلك أن هذه الرؤية الرجعية لمكانة المرأة تحملها أنغام موسيقية. وكلّنا يعرف كم يؤثّر ترداد النغم في تربية الأطفال ونمو أفكارهم وذهنيتهم.

لقد دافع محمد اسكندر عن أغنيته التي ألّفها ابنه قائلا إن عمل المرأة يؤثر في تربية الأطفال وتفكك الأسرة وتنظيم المجتمع.
نسعى حاليًا إلى منع بثّ هذه الأغنية عبر أثير الإذاعات اللبنانية. لكن للأسف هذه الأغنية ليست حالة فردية. يكفي التجوّل في شوارع بيروت لرؤية مدى الاستخفاف بعقول اللبنانيات والاتجار بأجسادهنّ.

على سبيل المثال، تظهر حملة إعلانية لجائزة يقدّمها أحد المتاجر الكبرى امرأة تقول: "إذا ربحت 300 مليون أجد بالتأكيد عريسًا". ونحن في جمعية "نسوية" رددنا على هذا الإعلان بآخر يقول: "إذا ربحت 300 مليون أفتح شركة إعلانات لا تستهبل البنات".

لمثل هذه التجاوزات ولكثير غيرها قررنا إطلاق مرصد الأسبوع المقبل يشير بالبنان إلى كل من تخوّله نفسه الإساءة للمرأة في الإعلانات والإعلام

وفي رد على الاغنية:

نحنا في عنّا شباب
منعتّز بثقافتها



بتفهم شو يعني شهادات
وبتعرف شو قيمتها



هنّي بيحبو البنات
بذكاها وحنّيتها



متلك مش عايزين رجال
همّا حالا وشهوتها





نحنا ما بدنا ولا شب
من عصر الجاهليّة



يجي يتحكم فينا
ويسميها رجوليّة



يقعدني قبالو بالفي
صبح وظهر وعشيّة



ويقلّي ما عندك شي
إلّا تهتمّي فيّة


عندي مركز عندي شغل
و ع قد المسؤوليّة



ما بيقدر ميّة مدير
بنظرة يتطّلع فيّة



حاجة تربحني جميلة
وانك خيفان عليّة



هاي مش قوة يا شاطر
هيدي ضعف وانانيّة


شو هالتخلف والجهل
واستعباد الحرية



عندي بي وام واهل
ربوني ووثقوا فية



بعرف دافع عن حالي
ولو كانوا قبالي مية



هاي مشكلتك اذا حبيت
بنت ضعيفة وغبية

sarah black كتب:

هاي مشكلتك اذا حبيت
بنت ضعيفة وغبية

بفهم انو أمهاتنا ضعاف وغبايا؟؟؟؟؟ الله يعزك !!

اقتباس :

حلوةةةة الغنية كتير
مرتو ويسطفل فيها!!!!!

على فكرة بالغنية بكون عما يغني لبنتو ..!!
مو لمرتو .. هيك قلي أبو السيم ..!!

هوة يجوز الوجهان على فكرة
بس ئصة الكليب غبية
و الأصح تكون حبيبتو
بعدين شوفيها هل الغنية حتى ضايجين هل الضوجة يا متحررين!!
شو ما سمعتو بالحملة اللي عم يطالبو فيها فيروز "رمز الصباح" تعتزل عن الغناء؟؟!!
فعلن شعب فاضي و عيشو راضي!!!!

gelsomino كتب:

أنا اكره ناس عليي هدول النسوان تبعون حقوق المرأة .. أنا حرة بحالي وما بدي حد يعلمني شو لازم طالب وأعمل!!
[/color]

وئت ماخلوكي اهلك تروحي عالرحلة من شهرين ماكان هيك رأيك وكان بدك حقوقك ..... وبدون هدول "النسوان" يلي عم يعترضو على مدى هالتاريخ كنتي هلأ غالبا واصلة للصف التالت ابتدائي وتاركة المدرسة ومتزوجة وعم تتبطخي لولادك الخمسة !!

gelsomino كتب:

لا انتي وياه
حلوةةةة الغنية كتير
مرتو ويسطفل فيها!!!!!

مشاااان اللي خلئك .... شو حمار ولا كيس فجل ليسطفل فيها!!!

1. هدول "النسوان" ما حلولي مشكلتي يوم الرحلة!!! وبظن موضوع الرحلة أتفه بكتير من انو تقارنيه بموضوع تعليم أو زواج وشغل .. وأهلي ما خلوني من خوفن عليي .. لو بنتي بدها تطلع برحلة جامعة دمشق الحكومية ما بخليها!!!! مع احترامي للهيئة المنظمة!! بظن ما في حق ومطلب الي أكبر من انو يكون في حدا يخاف عليي ويحميني ..

2. ئبل ما يطلعوا هـ"النسوان" سبئهن ديننا وقرآننا الكريم .. وهنن يلي خلوا عئلية أبي منفتحة وبعتني اتعلم ومستحيل يرضى يجوزني ئبل ما خلص تعليمي .. أبي ماشي على هالمنهج .. لا بيسمع لا لفلانة ولا لعلتانة..
راجعي كتاب الديانة صف التامن - درس عمل المرأة في الإسلام..

3. ئلة انجازات تاريخية وأجيال يبنوها تركوا كلشي ولحئوا الغنية؟؟
مين "الرجال" يلي حينوعظ ويعتبر ويبني حياتو على أساس هالغنية؟
ياما في أغاني هابطة بتجرح البنت وبتدني ئيمتها .. اجت على هي كتير انتخوا؟؟ ولا هديك عن تحرر المرأة معلي؟؟

4. لا تعدي تدئئي عالكلمات .. هية تسطفل فيه وهوة يسطفل فيها!!
بينات بعضن بيحلوا مشاكلن وبيتفئوا على حياتن .. ما دخل محمد اسكندر ولا جمعية حقوق المرأة تقرر عنن ..

ولأخذ العلم .. أنا ما باخد واحد متلو لمحمد اسكندر .. لو بدي اشتغل وحابة بشتغل .. طالما شغلي ما رح يأثر على جوزي وبيتي وولادي .. وبيحقق الشروط يلي موجودين بكتاب الديانة..

بس لاني بكره العالم يلي بيتفلسفوا زيادة .. ولاني دائما بئلك ما بطيئ طريئة تفكير هـ"النسوان" .. يلي بيحبوا يعئدوا الئصة ويعطوها أبعاد ما بتستاهلها .. البشر أصناف وأنواع .. في بنت ما بدها تشتغل وبدها واحد متل محمد اسكندر .. وعندي رفئات كتير هيك .. وما فيكي تئولي عنها ضعيفة أو غبية أو كيس فجل!! .. ربنا فوت المرأة يلي بتسعد زوجها وبتربي ولادها تربية صالحة الجنة .. وكمان فوت المرأة يلي بتشتغل شي لمجتمعها ودينها وبتفيدهن .. لا تئليلي هالنسوان بيعرفوا الصح أكتر منو سبحانه!
بأى انتو ريحولي مخكن شوي وصلحوا حالكن وحياتكن .. وتركوا للعالم حالها وحياتها ..

ياسو ..... ليش عم تحكي حكي كلنا حافظينو بصم ؟؟؟ على كلن مارح رد

عنجد شي بزعل أنو بنت فايتة تدرس إعلام بال2010 هيك رأيها , ياس هاد مو تفكير زايد ولا فلسفة هاد واقع المفروض نغيروا وإذا في ناس كتير عم تفكر متلك يبدو أنو شكلنا مطولييييييين لنتغير

طيب شو رايكون نتناقش بهدوء

gelsomino كتب:

1.
2. ئبل ما يطلعوا هـ"النسوان" سبئهن ديننا وقرآننا الكريم .. وهنن يلي خلوا عئلية أبي منفتحة وبعتني اتعلم ومستحيل يرضى يجوزني ئبل ما خلص تعليمي .. أبي ماشي على هالمنهج .. لا بيسمع لا لفلانة ولا لعلتانة..

عم تئولي الدين عطانا حئوئنا؟؟؟ 1920 وئت "باب الحارة" النسوان كانو يتعلمو؟؟؟ كانو يروحو على مدارس وجامعات؟؟؟ كانو يعملو شي غير الطبخ والنفخ واكل ال****
صح الدين عطانا حئوئنا بس كلو عالورق يعني نظري يعني ازا ما بتموتي ميت موتة ما بتاخدي شييييييي

اقتباس :

صح الدين عطانا حئوئنا بس كلو عالورق يعني نظري يعني ازا ما بتموتي ميت موتة ما بتاخدي شييييييي

أصدك بدك مين يطبق هالدين ... والله بهي معك حق ..
في ناس فهمانة الدين غلط .. ونتيجة هالفهم الغلط ..المرأة انحرمت من كتير من حقوقها ...
مثال صغير ... النسوان كانو يساعدو الرجال بالمعارك والحروب ... طبعا الكل بيعرف كيف هالمساعدة ..و هاد الشي كان زمان .. هلأ اطور شغل الرجال ..يعني ماعد في معارك و مدري شو .. وبالتالي لح تتطور نوعية المساعدة .. بقى وين المشكلة اذا ساعدت المرأة الرجل بكتير من أشغال هالحياة ...
ملاحظة صغيرة : هالغنية تافهة جدا جدا وما بتستاهل انو نفكر فيها أو نتناقش فيها اصال .....

اقتباس :

ملاحظة صغيرة : هالغنية تافهة جدا جدا وما بتستاهل انو نفكر فيها أو نتناقش فيها اصال .....[/color]

صح الغنية تافهة بس فتحتلنا مليون باب ومليون اصة

جد مو معئولين انتو .. خليكن هيك .. خالف تعرف .. ضلوا تفهوا العالم وأفكارهن .. دعاء خانوم لا شي بيزعل ولا شي .. أنا صحي مو شيخة .. بس وجهة نظر الدين دائما صح .. يا صاحبة الدين .. وأنا ما حكيت شي بيخالف حكيكن يلي حكيتو .. أنا بدي اتوظف بشهادتي وبدي اشتغل .. بس ما بنظر نظرتكن الدونية للمرأة يلي بدها تعد بالبيت .. يلي برجع بئلكن أمي وأمك وأمها وأمهات كتير ناس .. وعفكرة حتى تعرفوا اني متحضرة متلكن ومو جاية من أفا البقر .. أمي اشتغلت مبرمجة كمبيوتر بشركة صخر بالكويت وكانت مبلشة بالماجستير تبعها .. جدي الله يطول بعمرو متأكدة ما كان يتسمع لجمعيات حقوق المرأة بالكويت!! وجدي مواليد 1935 .. يعني من ئبل باب الحارة!!

بس أنا بكره تبعون حقوق المرأة .. لانو المرأة ما خسرت شرفها الا على ايدن .. لانو هنن يلي خلوا ناس متل هيفا وأمثالها يطلعوا للوجود .. ولانن تافهات .. تركوا الدنيا بحروبها ومجاعاتها وتركوا مية غنية تانية بتدني المرأة وبتعملها بس جسد وسلعة .. واجوا على هي .. اي كلها مو مستاهلة .. وبرجع بئلك يا سارة خانوم .. أبي من زغرو فهم دينو وطبئو مزبوط وعرف انو ديننا دين يسر .. وسألي ابوكي وابوها ليش بعتكن عالجامعة وليش سفرك عالامارات ؟؟ كرمال ربنا ولا كرمال شلة ناشطات؟؟ ليه كتير مصرين انو تلغوا دور الدين وتتفهوه لهالدرجة مبعرف .. مسلمين انتو ما ؟!!! ولا الدين ما تفعل دورو والناس عرفوه الا بس جمعيات حقوق المرأة حررتنا ؟؟؟

وعنجد لا بأى تردوا .. ولا بأى تئربوا عليي .. لانو هيك عئليات أنا ما بئدر اتحملها .. بتستفزني للعضم .. ومستحيل اتخذن رفئات ..

المفروض هاد المنتدى للنقاش وبتيجي بتئولي لا تردو .... على كلن براحتك ومارح اعملك رد 3 صفحات وعزبك
كلمتين ....ازا بتريدي لا تحكي هيك على خطيبتي فيا اخلاق اكتر من كتير ناس بمليون مرة ... والله وحدو بيعرف كل واحد منا ادي في دين مو انتي يلي بتقرري هادالشي ... وشو هاد أفا بئرة؟؟ ستحي على حالك شوي بئا
لك انتي ليش اخدة الشغلة شخصية؟؟؟؟ نزلي من بيتك بالمزة وشوفي البشر كيف عايشين

do3a2 كتب:

عنجد شي بزعل أنو بنت فايتة تدرس إعلام بال2010 هيك رأيها , ياس هاد مو تفكير زايد ولا فلسفة هاد واقع المفروض نغيروا وإذا في ناس كتير عم تفكر متلك يبدو أنو شكلنا مطولييييييين لنتغير

1. أكتر من هيك شي شخصي أديش بدك؟؟؟
2. أنا ما حكيت على أخلاق خطيبتك ولا ئربت عليها .. هية يلي جرحت فيني وطالعتني متخلفة!!!!
3. حدا كتير بيخاف على دينو وبيحبو .. ما بيطير عئلو وبتصير ابتسامتو شبرين على جملة
"************* .. وما بيضل مصر انو لولا هالنسوان كان الدين ما ئدر يعطي المرأة حقوقها ..

4. والله صعبة انزل من برجي العاجي .. لك حاج تلفي وتدوري .. لك ما في شي من حكيي بتردي عليه وبتناقشيني فيه نقاش طبيعي .. شو هي شوفي العالم كيف عايشة؟ شو مفروض يكون الها مغزى هالجملة يلي مفكرة حالك حتأفحميني فيها .. بتضلي تحكي حكي مالو معنى وجد بصفن شو بدي رد عليكي !!!!!
ويا ستي ردي براحتك وناقشي هالمرة .. بس ما تلوميني لاني ما رح رد أنا ..

1- هادا مو نقاش

2-الناس أزواق

3-أصابيع أيدك مو متل بعضا

4-المرأة أكبر من انو غنية تنزل من قيمتها
وبنفس الوقت اذا ضلت هيك الأمور عم تمشي رح تأثر سلبا أكيد
لانو نحن منعرف الإعلام أديش له تأثير

5-الغنية ضربت وعدد معجبينا أكتر من عدد معارضينا بس مو هون المشكلة
المشكلة انو نحن كيف مننظر لهل غنية

هل نحن مع انو يكون في حرية للعالم شو ما بدا تعمل

نحن من حط الحق عل قنوات والإذاعات
ليش ما من حط الحق عل أهل يلي ما مخلين أولادن يعرف الصح من الغلط

الغنية تافهة نعم

الغنية بايخة نعم

الغنية بتهدد حرية المرأة نعم

بس فينا نقول انو هادا الواقع موجود ولو حتى بنسبة 20 بالمية

وفي كتير أفلام مصرية حاليا موجودة بتشوه النساء كاملاً

أخيرا كلام كل واحد فيكن فيو نسبة من الصحة

بس برجع بئول نحن مع التوعية والمعارضة ونحن مع الحرية بنفس الوقت

بس لازم عئولنا يلي تتغير ونعرف نتناقش

ونعرف نميز بين الصح والغلط مو بس لنعمل هجوم عل الغلط لأ
كمان لنحاول نعمل أشياء صح تغطي عل غلط أد ما كان كبير

لانو الغلط ومتل ما عم تشوفوا عم يصعب تغيروا

لذلك نحن ليش ما منعمل شغلات صح تغطي عل الغلط وهيك من كزون عارضنا و وصلنا ليلي بدنا يا

وشكرا لكم جميعا

أول شي بحب اعتذر من ياس أنا صح ما ناقشت حكيت وجهة نظري بالشي يلي قريتو و حكيتها بالطريقة يلي باحكي فيها رفيقتي يعني ممكن كنت أحكيها بطريقة تانية لو كنت بعرف أنك مو رفيقتي. تاني شي أنا ما فهمت ولهلئ ليش حكيتي بالدين ودخلتي الموضوع وأنا ما بعتذر إذا ورجيت حالي صاحبة دين وصدمتك مثلا لأنو بصراحة وجهة نظر الناس في وتقيمهم لألي مو مهم . واخر شي يسلم تمك جورج .

العلة فينا انو كل واحد متمسك برأيو وكأنو منزل وناسي انو كل واحد الو عقليتوا الخاصة في ويلي لازم يحترمها الباقي شو ماكانت حتى ولو كانت غلط , فلذلك ياريت نكون راقيين أكتر من هيك بالنقاش تاني مرة وناخد أراء الأخرين برحابة صدر بعدين يضرب محمد اسكندر هو وغنيتو اذا بدها تفرء مابينا ولا شو

السلام عليكم...

منزعل من تقييم الناس لبعضهم

ومنزعل وئت منشوف حدا مخدوع بالضجة العالمية اللي كلها مجرد لت وعجن

منزعل أكتر وئت نشوف واحد عايش شكل وبيحكي شكل "الايمان ما وقر في القلب وصدقه العمل"

وبالنهاية انا شاركت بس حتى سلم عالجميييع
كيفكن اشتقتلكن كلكن فردا فردا