بعد مدة طويلة من الزمن .. اجتمع الاثنان صدفة، وكان هذا اللقاء :
القلم : مرحبا زميل
الأصبع : ( بنظرة ساخرة ) شو تفضّلت
القلم : عم انسلم
الأصبع : ( بتعجب ) بتعرفني شي ؟
القلم : مو ع أساس لحنا لتنين كنّا رفأة و منشتغل نفس الشغلة ؟!
الأصبع : ( بعنجهية و تكبر ) أنا .. و انت !!
القلم : ( بإصرار ) لك إيي شو نسيت !! كنّا نكتب سوا ؟
الأصبع : ( بقرف ) شو هي منكتب كمان ؟ أنا بطبع ما بكتب !! هي الكتابة بطلت من زمان .. شو وين عايش أنت ؟
القلم : ( بصوت خافت ) شو هالفزلكة !! إي مو النتيجة وحدة ؟
الأصبع : شو عم تبربر
القلم :لأا ما في شي .. بس كنت عم أوول شو هالخفة يخزي العين عنّك بتنط من حرف لحرف تؤوول " رونالدو "
الأصبع : ( بتأفف ) عم تتمصخر حضرتك ؟ مو أحسن منّك!! بينشف دمك إزا طول الموضوع ؟
القلم : إي صحيح .. بس لا تنسى أنو أنت كمان بدك شي حتى تشتغل .. كهربا _ شحن _ و لاّ بدّك اطىء زرار عالفاضي ؟
الأصبع : شي يطأك من بوزتك ..ألم ما بتستحي صحي !! أنت هللأ شو بدك مني ؟
القلم : ما في شي ألت لحالي لنحكيلنا كلمتين و نتبادل خبرات بعض بعد هالغيبة ؟
الأصبع : (زفرة طويلة و حارقة ) لك أي خبرات هيّ ليش حضرتك بشو فالح ؟
القلم : ( انألب وشّو ) لا تغلط بنوب ها !! و لك بيكفّي أنو ما بيمرؤ شيك إلا ما يشخطوني عليه !!
الأصبع : ( بصوت خفيت ) يشخطوك شأفتين !!
القلم : شو .. شو ألت ؟!
الأصبع لأ سلامتك مافي شي .. بس هي ما أسمها يشخطوك !! أسمها يشحطوك !
القلم : له .. لهون و بس .. لا تخلّيني أغلط فيك ؟
الأصبع : خلص أنا ما عدت أحكي معك بنوب !!
القلم : ليش زعلت !! وحدة بوحدة ..
الأصبع : طيب خلصنا .. و هلأ شو بدك لأني تأخرت
القلم : يلّي بدّي يا .. أنو نرجع صحاب متل أبل ، إي و الله كان يطلع معنا العجب بس لحط ايدي بئيدك.. شو نسيت !! إي من أبل زمن المعلقات و لحنا مع بعض !
الأصبع : لك على عيني .. ما حكينا شي .. بس هلأ إس إم إس وحده بتغنيك عن وجع الألب و هالدورة هي ؟
القلم : شوف لا ترجع تغلط ؟ إس و إم و مدري شو !!
الأصبع : لأ مو بس هيك و الايميل كمان نفس الشي !!
القلم : و منو هادا الايميل كمان بلا صغرا ؟!!
الأصبع : لك يا حبيبي هي كلللا وسائل جديدة .. وعلى أولتك بطأة زر وحدة بتصل المعلومة لوين ما بدّك
القلم : ولوووو .. ما حبّيتا منك هي ؟!! لك أنو بس المعلومة و الجملة هي المهمّة !! لك ما بتتزكّر بلقيس شو كانت تحبّ خطّو لنزار لمن كان يكتبلها شعر بئيدو.. و شلون كانت تسيل عواطفها متل حبر الكتابة .. وتتمايل مع الخط من فرحتا !1
الأصبع : أخي مزبوط بس ..
القلم : لأ سيدي مو بس هيك .. لأنو مو بكل وئت الواحد معو يشتري جهاز فينو يكتب عليه .. و شي بيئللك مافي شحن .. و شي مافي تغطية .. و شوبعرفني !! أما لحنا يا صاحبي ألم أزرء و الله نشالله يكون رصاص بيمشي الحال و بيئدر كل واحد يسجل خواطرو و أفكارو وين و أيمتا ما بدّو !!
الأصبع : ( بتنهّد ) بهي الحأ معك .. و الله زكرتني بئيّام زمان لمّا كنّا نحط ايدينا بإيدين بعض و نشخطا على أوولتك .. شي شعر و شي نثر و شي ما يصعب علينا شي ..
القلم : طيّب شو رأييك أنو نجتمع و لو يوم بالأسبوع .. يا أخي يوم بالشهر و نرجّع هديك الأيام ؟
الأصبع : و الله اشتأنا و الله، و أنا مستعدّ .. و من هلأ إزا بدّك
و رجعوا تنيناتون يكتبو بخطّ الإيد أحلى الرسائل و الخواطر اللي بتزكرنا بحالنا و ببعضنا متل الصور، الصحيح أنو الرسائل بخط الإيد إلها طعم غير شكل، هديك التانيي يمكن أسرع .. بس هي أحلى و فيها سدء أكتر .. اسمحولي فيا ..
موضوع: كلام بين السطور 
السبت يوليو 03, 2010 8:44 pm
