حكيلنا عن الرحلة بمعية شواربك !!..!!..!!

ياسيدي مشان الرحلة

أولا : بغض النظر عن كلشي انبسطنا كتيررررررررررررررررر
ثانيا: الإيجابيات

. كبرت الشلة وصرنا شباب وصبايا رفأت
. كل واحد فرجانا شي بشخصيتوا ما كنا منعرفا
. الأعدة كانت حلوة والجو كان كمان حلو لاشوب كتير ولا برد كتير
. صار جورج يأركل
. تصورنا لدرجة انو حسيت حالي بشي فلم وثائقي
. أعدنا ع البحر

ثالثا:السلبيات

. لولا انو الله كان معنا والشوفير ساعدنا كنا شوينا ع اتستراد طرطوس
. كان بدا نعرف أكتر وين بدنا نروح يعني تحديد المواقع أكتر لانو بهيك شي ما بيأدر الواحد يتركا عتيسير
. اللحمة كانت طيبة السلطة كانت بتصير أطيب بس عادي لانو نحن مو جاين نجرب بعضنا كل واحد عمل يلي بيأدر علي
. لو كنا أكتر كنا انبسطنا أكتر
. أنا روحة قلعة الحصن ما عجبتني لانو ضيعنا وأت كتير والوضع هونيك كتير سيئ يعني بدك ضل داير بالك منيح لانو العالم نوّر طبعا يلي عم يزوروا مو أهل البلد
. الأكل كان كتير كتير


رابعا:

بحب أشكر الشباب والصبايا عكل يلي عملوا مشان نجاح الرحلة

ونشالله منضل هيك عطول

ومنضل نعمل رحل

وطبعا بكلشي في أول مرة

وما في شي بيزبط دغري

يعني رحلة ورا رحلة رح ننبسط أكتر واكتر

هادا رأي الشخصي

أولاً: يسلمون معاذ عالموضوع
ثانياً:الايجابيات:1_انو عملنا رحلة لحالنا بدون الجامعة يعني قرارنا من راسنا ما حدا بئلنا لا تعملو هيك وعملو هيك
2-الرحلةكانت أهلية بمحلية يعني أغلب يلي رطلعو بيعرفو بعض واخدين وش على بعض ويلي طلعوا معنا من غير الشلة كانو ظراف وفاتو بالجو.
3-الطلعة على قلعة الحصن كانت ممتازة والله المناظر كانت بتاخد العئل وما ضيعنا وئت كتير فيها
4-الجو كان منيح وخرج طلعة والحمد لله ضل الجو منيح.
5-الحمد الله الاكل زبط معنا وطلع طيب على ذمة الشباب والصبايا
6-قرار الطلعة على بانياس باقتراح من المعام أبو عبدو درايفر كان بمحلو
ثالثاً-السلبيات:1-كترنا الغراض يلي أخدناها معنا ,يلا الواحد ما بيتعلم الا من كيسو

لك الله يلعن هيك نت شو بيجيب الجلطة فصل ابل ما كمل وما ادرت عدل,
السلبيات :2-ضيعنا وئت كتير لحتى لئينا ارنا نعد فيها بس الحمد الله كانت الأعدة حلوة.
3- الشحادات يلي دبؤنا وين ما رحنا والله كان بدها شار حتي يئلهم السؤال على الشكل التالي امتى بدكن تحلو عن سمانا.
رابعاً: بالمجمل كانت الرحلة بالشكل العام ومع سلبياتها بتاخد العئل مو هيك يا شباب وصبايا

أول شي: شكرا معاذ عالموضوع
تاني شي: الرحلة بالمجمل كانت بتجنن وكتيييييييير حلوة وإيجابياتها طاغية عالسلبيات.
تالتاً: الإيجابيات:1- العدد كان معئول" يعني مافي هالعجئة"كلنامنعرف بعض تئريبا. وهيك أحلى برأيي
2- روحة ئلعة الحصن كانت حلوة, شفنا مناظر رائعة وتصورنا لحتى هلكنا
3- ضحكت ضحك بهالرحلة عن سنة" وتعرفت عالشلة أكتر واكتشفت جوانب فيون كتير حلوة" خصوصا انو خرج يشتغلو شغل النسوان لانو انئلبت الآية الشباب مهموكين والبنات آعدين " بس والله ياجماعة أنا عرضت خدماتي
4- مابعرف ليش السلطة ماعجبتكم" والله أنا لئيتا طيبة كتير" بالمناسبة يسلمو معاذ وسارة شي بشهي.
السلبيات: 1- كان يفضل لو طلعنا عاللادئية بدل طرطوس
2- يعني ئلعة الحصن لازم كنا نطول فيها أكتر ما شفناها كلها

3- انبرى لساني وأنا ئلكن " حطولي غنية لرامي عياش" بالباص وما حا لحا
وآخر سلبية : انو ياسمين ونورا و ليلاس ماطلعو معنا والله كنا انبسطنا زيادة
اقتراحات مشان المرة الجاي نشالله: لازم كنا الساعة6 ننطلق من الشام
ونحدد اتجاهاتنا من الأول. مشان نكسب النهار وكان فينا نرجع شي 12 ونص بدل 11.
يللا خيرا بغيرا
بس بزمتي رحلة ولا احلى لدرجة اني رجعت عالبيت زعلانة كان بدي ياها تطوّل أكتر
شكرا كتيييييير عالرحلة يا أحلى شلة أوكليشن ونشالله تعيشو وتعملولنا رحل دايما

بما اني كنت منظم هل الرحلة فأنا لئيت هل الرحلة حلوة و ناجحة الى ابعد حد من وجهة نظري و لائت استحسان الجميع
من ايجابياتها: انها كانت منظمة يعني متل ما شفتو ما تعزبنا كتير و تاني شي ما نئصنا شي الحمدلله
بس اكتر شغلة زعجتني و دئئت عليها انها كانت فعلين ئصيرة المرة التانية لازم نكون محددين ارنة وحدة بس مشان نئعد مع بعضنا اكبر وئت ممكن
و كل ما كان المكان اقرب كل ما كان الوئت اكتر
و أهم شي : لازم نكون الطلعة الجاية نايمين كم ساعة لاني الصراحة فطست و ما عدت مركز آخر شي
اكبر سلبية ئبل ما انسى انو العضو المشاغب غلسومينا (ما كانت موجودة و استفئدنالها كتير و الله )
و بعدين جبنا اكل كتير ما كان بدها كل هل اللبكة تاني مرة ح تشوفو التقشف ع اصولو (مو لابئلكن الكرم الزايد)

و هاد كلشي باختصار و ميرسي لكل الشباب و الصبايا اللي كانو الصراحة بعئدو و عئبال عند رحلة ترفيع السنة الاولى (ئولو آمين )

اي والله امين سيمو
الرحلة كانت بتجننننننن وانا نبسطت لدريجة رهيبة
العدد كان كتييير حلو وظريف
انا مع نور انو كان لازم نضل بقلعة الحصن وئت اكتر ولازم نحدد المطرح من الاول
واحلى شي بكل هالرحلة لعبة الطابة بالاستراحة
اكتر سلبية كانت انو ما اعدنا غير شوي ببانياس ولتهينا بالاكل والسلطة واللحمة وما أعدنا كتير وحكينا
يسلمون شباب وصبايا الجمعة الماضي بعتبرو من احلى ايام حياتي

انا بقول انو كانت الرحلة كككتيييير حلوة وكانت اجمل واحلى ايام حياتي ولا, لانو هي اول رحلة اطلعت فيها مع رفقاتي على كيفي .
ومن ايجابيات الرحلة :1-الهويات كانو كتير حلوبن
2-والشباب كانو كتير ظراف معي,يعني خرج الواحد يطلع معن هيك مشاوير
3-ومتل ماقالوا الشباب اخد الطريق كتير من وقتنا وما قعدنا كتير واحلى شي بالرحلة الشوي والسباحة والطابة يعني بشكل عام الرحلة كانت كتتتتتييييييييير حلوة وان شاء الله بنعيدها مرة تانية بعد الامتحانات وشكرا كتير على هل الرحلة

بعتقد انو صار دوري مو ؟؟؟
أولا الايجابيات ....:
1_ الجو كان كتير حلو
2_ العالم اللي طلعوا حبابين من الدرجة الممتازة
3_الفطور كان وازن ...
4_ الباص انتصحنا فيه باستثناء أجاره
5_ المقصف اللي قعدنا فيه كان كتير حلو
6 _ طلعة قلعة الحصن كانت حلوة .. يعني الوقت اللي قضيناه فيها كان معئول
7_ الغداء كان كتير طيّب و الأراكيل وازنين....
8_ الصور اللي أخدناهن بالرحلة مجملاً كانو حلوين .. مع انو لسا ما جبتهن
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
السلبيات :
1_ الرحلة ما كان قلها مخطط منظم ... يعني هيك طلعات المفروض تكون مهيكلة أكتر
2_ الوقت كان قصير جداّ يعني المفروض نطلع 6 و نرجع 12 و كمان المفروض ما نضوّع وقت خلال الرحلة و نستغل كل دئيئة
3_ العدد كان شوي قليل و عدد الشباب كان طاغي ع البنات... حتى اني حسيت انو مافي بنات بالمرة ( لأنو حتى شغل البنات نحنا -الشباب- أشتغلناه .... باستثناء انو الكبيرة اشتغلت بالسلطة و انا ساعدتها )
4_ الغراض كانو كتير كتير كتار ... يعني في كتير شغلات كانت مو لازمة و في شغلات كانت لازمة بس كتيرة متل الخبز مثلا
5_ الرحلة كانت شوي مكلفة << بس السبب هو قلة الناس الطالعة نوعا ما و الغراض الكتار اللي جبناهن >>
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
بشكل عام كانت الرحلة كتير رائعة-بل أكثر من رائعة- و بتجنن و الفيديو رح يأثبت هالشي....
و أحلى شباب و أحلى صبايا و أحلى خمسمية محروئة
و الرحلة الجاية و انتو بخير

تزكرت بدي ضيف شغلة من الايجابيات
انو الشبين والصبية يلي طلعو معنا ومابيعرفونا ( نور - احمد - كنان ) دغري فاتو بالجو واندمجو وريحونا من الرسميات والعلاك

شكرا يانسة sarahهاد من ذوفك الحلو

وأنا بوا فقكم الرأي أنو الرحلة كانت روعة لأنو الخطيبة كانت مروءة عل الاخر مع أني حاولت أنزعلها مراءها أما  أهم السلبيات يلي نسيتوها أني انا دعاء ما كنت معكم